Robotkirurgi prostata

All informasjon om operasjonen får du på prostatakreftpoliklinikken. Du må gjerne ha med deg pårørande til denne timen. Du får også innkalling til ein førebuande dag på preoperativ poliklinikk. Denne dagen skal du:

• snakke med sjukepleiar
• ta blodprøver
• bli undersøkt av lege
• eventuelt ha samtale med operatør/overlege (dei fleste har hatt samtale tidlegare på prostatakreftpoliklinikken)
• få informasjon om trening av bekkenbotn
• ha samtale med anestesilege eller anestesisjukepleiar
• eventuelt gjennomføre andre undersøkingar
• ta med urinprøve

Tarmtømming i forkant av operasjon

I enkelte tilfelle kan det vere nødvendig å tømme tarmen før operasjonen ved å ta eit lite klyster (klyx-120 ml) som du får kjøpt på apotek. Vi vil gje deg beskjed dersom dette gjeld deg. 

Oppmøte

Du vil bli tatt imot av sjukepleiar som førebur deg til operasjon. Dette inneber:

• Du får tildelt seng.
• Operasjonsfeltet blir barbert
• I enkelte tilfelle blir det tatt blodprøver.
• Samtale med operatør, dersom du ikkje har hatt det på førehand.

Cirka ein halv time før du blir køyrt til operasjon, får du smertestillande og roande medisin med litt vatn. Då er det viktig at du har pussa tennene og tømt urinblæra.

På operasjonsavdelinga møter du operasjonssjukepleiar og anestesisjukepleiar. Dei skal passe på deg under operasjonen. Anestesilegen vil gi deg narkose/bedøving.

Under operasjonen blir det lagt inn eit kateter i blæra. Det er eit mjukt gummirør som går via urinrøret til blæra, og som gjer det mogleg å følge med på urinproduksjonen. Dette kateteret skal du ha i ca 10 dagar etter operasjonen.

Prostata blir fjerna med den grad av omliggande vev som stadiet til kreften tillèt. Kirurgen tar sikte på ein grad av nervesparande kirurgi hos dei fleste pasientane for å oppnå best mogleg funksjonelt resultat etter operasjon.

Etter at prostata er losna, syr vi blæra mot urinrøret og kateteret blir lagt inn. Prostata blir tatt ut gjennom eit 5 cm langt snitt over navlen. Vi let att huda med klips som kan fjernast etter 10-14 dagar.

Etter operasjonen blir du liggande på overvakingsavdelinga i nokre timar før du blir køyrt tilbake til sengepost.

Smertelindring

Det er normalt å ha smerter etter ein operasjon, spesielt ved bevegelse. Du får smertestillande tablettar. For å få til ei god smertebehandling er det viktig at du gir oss tilbakemelding dersom du har behov for meir smertestillande.

Ernæring

I tillegg til intravenøs væske, oppfordrar vi deg til å drikke godt. Viss du ikkje er kvalm kan du få eit lett måltid på kvelden operasjonsdagen.

Mobilisering/fysisk aktivitet

God smertelindring gjer at det er mogleg å vere fysisk aktiv sjølv om du er nyoperert. Aktivitet er avgjerande for at du skal kome deg raskt etter operasjonen.

Allereie operasjonsdagen kan du få hjelp til å kome opp av senga og eventuelt sitje oppe.

Kva skjer når du er fysisk aktiv:

• Du pustar djupare og førebygger lungebetennelse.
• Matlyst og fordøyelse kjem raskare i gang.
• Såra gror betre fordi blodsirkulasjonen aukar.
• Bevegelse stimulerer blodsirkulasjonen og førebygger blodpropp.

Første dagen etter operasjon

Vi tar blodprøver og sjekkar operasjonssåret. Tidspunkt for heimreise er basert på ei medisinsk vurdering. Dei fleste reiser 1-2 dagar etter operasjonen. Viss du kjem langvegs frå kan du få ligge på pasienthotellet til du er i stand til å reise heim.

Du får utreisesamtale med lege og sjukepleiar.

Kateterstell

Blærekateteret skal du ha i ti dagar etter operasjonen, slik at skøyten mellom urinrøret og urinblæra får mest mogleg «ro» mens det blir lækja. Dette medfører at du må reise heim med blærekateter. Du vil få meir informasjon om dette før heimreise.